ខេត្តបន្ទាយមានជ័យ ៖ ប្រជាពលរដ្ឋជួបបញ្ហាលំបាកខ្វះខាតជាង១០០គ្រួសារនៅក្នុងស្រុកមង្គលបូរីបានទទួលអំណោយមនុស្សធម៌របស់សាខាកាកបាទក្រហមកម្ពុជាខេត្តបន្ទាយមានជ័យ ដែលបានជួយដោះស្រាយសម្រួលបានមួយចំណែកដល់ជីវភាពរស់នៅប្រចាំថ្ងៃរបស់បងប្អូនដែលកំពុងជួបលំបាកដោយសារវិបត្តិនៃជំងឺកូវីដ១៩នេះ។
អភិបាលខេត្តបន្ទាយមានជ័យ ឯកឧត្តម អ៊ុំ រាត្រី ជាប្រធានគណៈកម្មាធិការសាខាកាកបាទក្រហមកម្ពុជាខេត្តរួមនឹងក្រុមការងារបាននាំយកអំណោយមនុស្សធម៌នេះចុះទៅចែកជូនដល់គ្រួសារដែលជួបការលំបាកមាន ចាស់ជរា ជនពិការ ស្រ្តីមេម៉ាយចំនួន ១១១គ្រួសារក្នុង ១៣ឃុំ របស់ស្រុកមង្គលបូរី ខេត្តបន្ទាយមានជ័យ កាលពីថ្ងៃទី២០ ខែមិថុនា ឆ្នាំ២០២០នេះ។
ថ្លែងក្នុងឱកាសនោះ ឯកឧត្តម អ៊ុំ រាត្រី ប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យបានមានប្រសាសន៍ពាំនាំការផ្តាំផ្ញើសាកសួរសុខទុក្ខពីសំណាក់សមេ្តចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាជូនដល់បងប្អូនប្រជាពលរដ្ឋ យើងដែលជានិច្ចកាលសម្តេចតែងតែយកចិត្តទុកដាក់គិតគូរពីសុខទុក្ខជីវភាពរស់នៅប្រជាពលរដ្ឋដែលជួបបញ្ហារងគ្រោះនៅគ្រប់ទីកន្លែងទូទាំងប្រទេសកាកបាទក្រហមកម្ពុជាតែងតែឆ្លើយតបនិងផ្តល់ជាអំណោយទាន់ពេលវេលាដោយពុំមានការបែងចែករើសអើងប្រកាន់និន្នាការនយោបាយអ្វីឡើយ ។
ឯកឧត្តម អ៊ុំ រាត្រី ក៏បានបញ្ជាក់បន្ថែមទៀតថា ទោះបីអំណោយដែលចែកជូនដល់បងប្អូននេះមានតិចតួចគ្រាន់តែជួយសម្រួលដល់ជីវភាពបានមួយគ្រា តែនេះបានបង្ហាញពី កាយវិការនិងសន្ដានចិត្តប្រកបដោយមនុស្សធម៌ពេលនេះបានលើកទឹកចិត្តមិនត្រឹមតែបងប្អូនមានជីវភាពខ្វះខាតចាស់ជរាមានជំងឺប្រចាំកាយប៉ុណ្ណោះទេគឺជាសារមួយបញ្ជាក់ឱ្យឃើញច្បាស់អំពីបេះដូងមនុស្សធម៌និងស្មារតីមនុស្សជាតិដែលសាខាកាកបាទក្រហមធ្លាប់បានអនុវត្តកន្លងមក ក៏ដូចជាទៅអនាគតស្របតាមអនុសាសន៍ណែនាំជាប្រចាំពី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាកាន់តែត្រូវបានពង្រឹងពង្រីកបន្ដទៀត។
ជាមួយគ្នានេះដែរ ឯកឧត្តម អ៊ុំ រាត្រី ក៏បានក្រើនរំឭកដល់ប្រជាពលរដ្ឋទាំងអស់ត្រូវនាំគ្នាយកចិត្តទុកដាក់ពីការថែទាំសុខភាពចៀសវាងការឆ្លងរោគកូវីដ១៩សូមបន្តរស់នៅត្រូវប្រកាន់ខ្ជាប់នូវអនាម័យស្អាតជានិច្ចបន្តពាក់ម៉ាសឬក្រមាការពារនិងដុសលាងសម្អាតដៃដោយសាប៊ូទឹកអាល់កុលឬទឹកជែលសម្អាតកម្ចាត់មេរោគនិងបាក់តេរីផ្សេងៗឱ្យបានជាប្រចាំចៀសវាងការចម្លងរោគពីម្នាក់ទៅម្នាក់ដែលនាំមកនូវការសោកស្តាយអស់មួយជីវិត។ប្រសិនបើមានករណីសង្ស័យ សូមរាយការណ៍មកមន្ទីរក្រសួងសុខាភិបាលជាបន្ទាន់ តាមរយៈលេខ ១១៥ ។
សូមបញ្ជាក់ថា អំណោយមនុស្សធម៌ដែលបានយកមកផ្តល់ជូនប្រជាពលរដ្ឋខ្វះខាតទាំង១១១គ្រួសារដោយក្នុងមួយគ្រួសារទទួលបានអង្ករ២៥គីឡូក្រាម,ត្រីខ ១០កំប៉ុង,ប្រេងឆា ១ដប,សាប៊ូ ១ថង់,ទឹកត្រី ៣ដប, អាវយឺត ២,និងថវិកា១ម៉ឺនរៀលទៀតផង៕
សូមបញ្ជាក់ថា អំណោយមនុស្សធម៌ដែលបានយកមកផ្តល់ជូនប្រជាពលរដ្ឋខ្វះខាតទាំង១១១គ្រួសារដោយក្នុងមួយគ្រួសារទទួលបានអង្ករ២៥គីឡូក្រាម,ត្រីខ ១០កំប៉ុង,ប្រេងឆា ១ដប,សាប៊ូ ១ថង់,ទឹកត្រី ៣ដប, អាវយឺត ២,និងថវិកា១ម៉ឺនរៀលទៀតផង៕
