ខេត្តសៀមរាប÷ មានសេចក្តីរាយការណ៍ មកថា នៅវេលាម៉ោង ១២:៣០នាទី នាថ្ងៃទី ១៧ ខែមីនា ឆ្នាំ២០២២ មានអាត្រាក់ទ័រ ចំនួន ពីរ គ្រឿង បានធ្វើសកម្មភាព ឈួសឆាយ ដីគម្របព្រៃឈើ នៅចំណុច រហាលយាង យ៉ាងរលូន ដើម្បីយកដី ធ្វើជាកម្មសិទ្ធិ ផ្ទាល់ខ្លួន រីឯអាជ្ញាធរ និង មន្រ្តី ជំនាញ ហាក់បីដូចជា មិនសូវអើពើ យកទុកដាក់ ទប់ស្កាត់ ឬខ្វល់ខ្វាយ ពីការវិនាស ហិនហោច ព្រៃឈើ ឡើយ ។
តាមសេចក្តីរាយការណ៍ បានបន្តឲ្យដឹងថា ម្ចាស់អាត្រាក់ទ័រ មានឈ្មោះ រុន កយ មានទីលំនៅក្នុងភូមិ មួយរយបី ហើយម្ចាស់អាត្រាក់ទ័រ អាចល្មើសនិងច្បាប់ចូលទៅឈួសឆាយ ដីព្រៃគម្របព្រៃឈើ ខ្វាវបានដោយរលូនបែបនេះ ដោយសារ មានការបើកភ្លើងខៀវ ពីសំណាក់លោក វ៉ាង ដាំ មេភូមិ មួយរយបី និង លោក មឿន មេភូមិ កំបោរអ ឋិតក្នុង ឃុំខ្វាវ ស្រុកជីក្រែង ខេត្តសៀមរាប ។
បន្ទាប់ ពីក្រុមអ្នកសារព័ត៌មាន បានប្រទះ ឃើញ ក្រុមទុច្ចរិត កំពុងយកគ្រឿង ឈួសឆាយដីគម្របព្រៃឈើ នៅខាងត្បូង រហាលយាង បាននាំគ្នាទំនាក់ទំនង ទៅមន្រ្តីជំនាញ រដ្ឋបាលព្រៃឈើខ្វាវ ដើម្បី ចុះមកទប់ស្កាត់ ឬឃាត់គ្រឿងចក្រនិងម្ចាស់ផងដែរ តែពេលឃើញក្រុមមន្រ្តីជំនាញទៅដល់ ក្រុមទុច្ចរិតទាំងនោះ បាននាំគ្នា បើកអាត្រាក់ទ័រ គេចខ្លួន បាត់ស្រមោល ។ តាមប្រភពបន្តថា បន្ទាប់មក មន្ត្រីជំនាញរដ្ឋបាល ព្រៃឈើខ្វាវ ដែលមានលោក ភោគ វិរៈ ជានាយសង្កាត់ បានកោះហៅ ម្ចាស់អាត្រាក់ទ័រ និង ជនដែលពាក់ព័ន្ធ មួយចំនួនទៀត ចូលខ្លួន ដោះស្រាយផងដែរ តែក្រុមទាំងនោះ មិនព្រមចូលទៅដោះស្រាយ ហាក់បីដូចជា មើលងាយ ចំពោះជំនាញរដ្ឋបាលព្រៃឈើខ្វាវ យ៉ាងច្បាស់ណាស់ ។
តែក្នុងនោះមហាជន រង់ចាំមើលថាតើ លោក ភោគ វិរះ នាយសង្កាត់រដ្ឋបាលព្រៃឈើខ្វាវ អាចមានសមត្ថភាព ចាប់ខ្លួនក្រុមទុច្ចរិត ដែលហ៊ានថ្លើមធំ ល្មើសនិងច្បាប់ ឈួសឆាយដីគម្របព្រៃឈើ ដែលជាដីសាធារណៈរបស់រដ្ឋបានដែរឬទេ? មហាជនបន្តថា ខណៈពេលនេះ គឺគេសង្កេតឃើញថា មន្ត្រី បានស្គាល់ទាំងមនុស្សនិងឈ្មោះ ច្បាស់បែបនេះហើយ បើមន្រ្តីជំនាញ និង អាជ្ញាធរ ពាក់ព័ន្ធ ក្នុងឃុំខ្វាវ និងក្នុងស្រុកជីក្រែង មិនអាចចាប់ខ្លួនក្រុមទាំងនោះបានទេ នោះ មានន័យ មន្រ្តីជំនាញ និង អាជ្ញាធរ ពិតជាអសមត្ថភាព ប្រាកដណាស់ ៕
