(ព្រះវិហារ)៖ លោក វុធ សាវី ព្រះរាជអាជ្ញារង និងជាអ្នកនាំពាក្យអយ្យការតុលាការខេត្តព្រះវិហារ បានឱ្យដឹងថា អយ្យការ គ្រោងនឹងចេញលិខិតកោះហៅប្រធានផ្នែក រដ្ឋបាលព្រៃឈើឆែប លោក សេង លាង ឱ្យចូលឆ្លើយបំភ្លឺ ករណីឈ្មួញឈើម្នាក់បានរត់គេចខ្លួន ដោយពុំដឹងមូលហេតុ។
លោក វុធ សាវី បានបន្តថា៖ “លោកកំពុងរៀបចំឯកសារលិខិតកោះអញ្ជើញ លោក សេង លាង នាយផ្នែករដ្ឋបាលព្រៃឈើឆែប និងមន្ត្រីមួយចំនួនទៀតឱ្យចូលឆ្លើយបំភ្លឺ ក្នុងករណីដែលបណ្តែត បណ្តោយ ឱ្យឈ្មួញឈើម្នាក់បានរត់គេចខ្លួនបាត់”។
មូលហេតុដែលលោកនឹងចេញលិខិតកោះហៅ លោក សេង លាង ឱ្យចូលឆ្លើយបំភ្លឺនោះ គឺបន្ទាប់ពីលោកទទួលបានព័ត៌មានពីកូនចៅរបស់លោករាយការណ៍មកថា មេឈ្មួញឈើដុះស្លែម្នាក់ឈ្មោះ ឡាំ ដែលលោកដឹកនាំកម្លាំងចុះបង្ក្រាបនៅភូមិឆែបពីរឃុំឆែបកើត ស្រុកឆែប ខេត្តព្រះវិហារ កាលពីថ្ងៃទី២៩ ខែសីហា ឆ្នាំ២០២១ កន្លងទៅនេះ គឺបានរត់គេចខ្លួនហើយ។
ក្នុងពេលប្រតិបត្តិការចុះបង្រ្កាបករណីជួញដូរឈើខុសច្បាប់នៅទីតាំងនេះជនសង្ស័យជាម្ចាស់ទីតាំងឈើឈ្មោះ ឡាំ រូបនេះមានវត្តមាននៅកន្លែងកើតហេតុ ជាធម្មតា មិនបានរត់គេចខ្លួននោះទេ ។ប៉ុន្តែដើម្បីកុំឱ្យជនសង្ស័យឈ្មួញឈើរូបនេះដឹង ខ្លួនលោកក៏បានប្រាប់ លោក សេង លាង និងមន្ត្រីពាក់ព័ន្ធត្រូវចាប់ខ្លួនឈ្មួញឈើរូបនេះ ហើយលោកក៏បានចាកចេញពីទីតាំងបង្ក្រាបឈើនេះទៅ។
លុះស្អែកឡើងកូនចៅរបស់លោករាយការណ៍មកថា ឈ្មួញឈើដុះស្លែឈ្មោះ ឡាំ រូបនេះបានរត់គេចខ្លួនហើយ ទើបលោកនឹងរៀបចំលិខិតកោះអញ្ជើញមន្ត្រីពាក់ព័ន្ធឱ្យឆ្លើយបំភ្លឺក្នុងពេលឆាប់ៗនេះ៕
