(ឧត្តរមានជ័យ)៖ កាលពីរសៀលថ្ងៃទី៥ ខែកក្កដា ឆ្នាំ២០២១ កម្លាំងនគរបាលខេត្តឧត្តរមានជ័យបានបង្ក្រាបដំណាំកញ្ឆាមួយកន្លែងនិងចាប់ជនសង្ស័យបាន៣នាក់។
ទីតាំងដាំកញ្ឆានេះនៅក្នុងចម្ការស្វាយម្តុំពាង២ស្ថិតក្នុងភូមិអូរតាមែងឃុំ-ស្រុកអន្លង់វែងដែលជនខិលខូចបានធ្វើសកម្មភាពលួចបង្កប់ដាំដំណាំកញ្ឆានេះមានទំហំ៥.៥០០ម៉ែត្រការ៉េ។
កម្លាំងនគរបាលខេត្តឧត្តរមានជ័យ បានឱ្យដឹងថា ក្នុងប្រតិបត្តិការនេះសមត្ថកិច្ចបានចាប់ជនសង្ស័យចំនួន៣ នាក់។ក្នុងនោះមានស្រី ២នាក់ ព្រមទាំងដកហូតបាននូវ កញ្ឆាក្រៀមចំនួន ៣៦ គីឡូក្រាម,ដកបំផ្លាញចោលកញ្ឆាស្រស់ចំនួន១២.៥០០ដើម,រថយន្ត១គ្រឿង,គោយន្តកន្ត្រៃ១គ្រឿង និងសម្ភារមួយចំនួនទៀត ។
ជនសង្ស័យ និងវត្ថុតាងខាងលើត្រូវបានសមត្ថកិច្ចជំនាញ កំពុងរៀបចំកសាងសំណុំរឿង បញ្ជូនទៅសាលាដំបូងខេត្តឧត្តរមានជ័យដើម្បីចាត់ការបន្តតាមនីតិវីធី ៕
